ከዚያም እቴጌይቱ ንጉሠ ነገሥቱና መኳንንት መሣፍንቱ ፍልውሃ ለመታጠብ በወረዱ ጊዜ ያርፉባቸው ከነበሩ ድንኳኖች ዙሪያ ለሕዝብ መሬት እንዲታደል ተወሰነና ጎጆዎች በዕቅድ መቀለስ ጀመሩ፡፡ እንጦጦ የነበረው የአብያተ-ክርስቲያናት ግንባታ ሳያቋርጥ የተለያዩ የልማት ዕቅዶች ተነድፈው አዲስ አበባ እየለማች ሄደች፡፡ በአንጻሩም ፍልውሃው ነገሥታቱ፣ መኳንንቱና መሳፍንቱ ብቻ ሳይሆኑ ሕዝቡም በብዛት እንዲያዘወትረው የመታጠቢያ ሥፍራዎች ዘመኑ በፈቀደውና በተሻሻለ ሁኔታ እንዲሠሩ ተወስኖ ሥራው ቀጠለ፡፡ ሕዝቡም ከዳር ሀገር አንስቶ አዲስ አበባ ድረስ በረጅም ጉዞ እየተመመ መምጣቱን ቀጠለ፡፡

ለፍልውሃና ለጠበል እዚህ የሚገባውን ሕዝብ የማስተናገድ ፈሊጥ በመገኘቱ ሕዝቡ በፍልውሃው ዙሪያ ቤትመሥራትና አገልግሎቶች መፍጠሩን ተያያዘው፡፡በኢትዮጵያ በብዙ መቶዎች የሚቆጠሩ የፍልውኃ ምንጮች፣በተለያዩ ክልሎቿ እንደሚገኙ የተረጋገጠ ነው፡፡ ከመካከለኛው ምሥራቅ ከሊባኖስ አካባቢ በሚነሳው ታላቁ ስምጥ ሸለቆ ወሽመጥ ላይ ስለምትውል አብዛኛው መልክአ ምድራዊ አካልዋ የፍልውሃ የልዩ ልዩ ጠበሎች የተለያዩ ፍቱን መድኃኒት ያቋቱና ያዘሉ ንጥረ ነገሮች ምንጮች በቃላት ሊገለጹ የማይችሉ ፀጋዎችና አስደናቂ ተፈጥሮአዊ ገጽታዎች እንዳሏት የታወቀ ነው፡፡ የአዲስ አበባ ፍልውሃም ከእነዚሁ ሕሩይና ግሩም በረከቶች መካከል አንዱ ነው፡፡ በዚህ የተነሳ ህብረተሰቡ ለተለያዩ በሽታዎች ማለትም  ለመገጣጠሚያ ብግነት፣ ለቁርጥማት፣ ለነርቭ በሽታ፣ ለአጥንት መሣሣት፣ ለጡንቻ መተሳሰርና መሰል የጤና ችግሮች ፈውስ ሰጪ የሆነውን ከከርሰምድር የሚፈልቅ የፍልውሃ ጠበል ተጠቃሚ ይሆን ዘንድ አፄ ኃይለስላሴ በዘመናዊ መልክ የፍልውሃ አገልግሎት ድርጅትን እንዲመሰረት አደረጉ፡፡